Dëshmitarja i përgjigjet pyetjeve të mbrojtjes së Hysni Gucatit – AlbMania          

Dëshmitarja i përgjigjet pyetjeve të mbrojtjes së Hysni Gucatit

 Dëshmitarja i përgjigjet pyetjeve të mbrojtjes së Hysni Gucatit

Dëshmitari i parë i Zyrës së Prokurorit të Specializuar kundër ish-krerëve të Organizatës së Veteranëve të Luftës së UÇK-së, po dëgjohet edhe sot në Dhomat e Specializuara në Hagë, ku po iu përgjigjet pyetjeve të avokatit mbrojtës.

Zenka Pumper, e cila është hetuese në ZPS dhe po dëshmon në këtë gjykim, ka thënë se dokumentet, të cilat i ka shqyrtuar kanë pasur përcaktimin si konfidenciale, por që nuk është në dijeni se kush ishin personat që kishin bërë një përcaktim të tillë.

Pumper ka thënë se para 25 shtatorit 2020, nuk ka parë asnjë dokument nga ajo që e ka konsideruar pastaj si paketa 1, meqë sipas saj, nga kjo datë edhe është përfshirë në hetimin e kësaj çështje.

Dëshmitarja i është përgjigjur pyetjeve të mbrojtjes së Hysni Gucatit, avokatit Jonathan Elystan Rees.

Rees-Pumper: Pyetje-përgjigje

Avokati Rees: Keni parë ndonjë nga dokumentet që ishin në atë që e quani ju paketa1, përpara se të fillonit shqyrtimin, pak kohë pas 25 shtatorit?

Dëshmitarja Pumpe: Jo.

Avokati Rees: Asnjë dokument të vetëm?

Dëshmitarja Pumper: Nuk besoj që kam parë.

Avokati Rees: Në paragrafin 6 të deklaratës përshkruani paketën 1 si një paketë që kishte 891 faqe dokumentesh në anglisht, serbisht, gjermanisht. Ju flisni shumë mirë anglisht, besoj që flisni edhe gjermanisht, po serbisht flisni, apo kishin ndihmës që ju ndihmuan për të përkthyer dokumentet?

Dëshmitarja: Të dyja.

Avokati Rees: Kur e keni parë përkthimin, a keni mbajtur ndonjë shënim për përkthimet?

Dëshmitarja Pumper: Po, mbajtëm shënime.

Avokati Rees: Ku ndodhen këto?

Dëshmitarja Pumper: Janë në bazën e të dhënave.

Avokati Rees: Në cilën?

Dëshmitarja Pumper: Në bazën e të dhënave të brendshme.

Avokati Rees: Pra, një dokument që nuk është parashtruar për qëllime prove.

Dëshmitarja Pumper: Ashtu është, nuk ka as vulë.

Avokati Rees: Megjithatë mbahet në bazën e të dhënave të ZPS-së?

Dëshmitarja Pumper: Po, ashtu është.

Avokati Rees: Në paragrafin 7 pohoni se paketa 1 përfshin kërkesa konfidenciale për ndihmë, kështu?

Dëshmitarja Pumper: Po.

Avokati Rees: Me këtë doni të thoshit se këto kërkesa për ndihmë ishin konfidenciale?

Dëshmitarja Pumper: Po, ishin kërkesa konfidenciale.

Avokati Rees: Si e keni kuptuar ju apo si e kuptoni ju fjalën konfidencialitet, kur keni bërë këtë pohim e kishit parasysh faktin që kërkesat ishin konfidenciale dhe matën shkallën kur këto kërkesa duhet të klasifikoheshin si konfidenciale?

Prokurorja Bolici: Kundërshtojmë, janë të njëjtat pyetje që u bënë edhe dje të cilat ju nuk i pranuat zotëri gjykatës.

Avokati Rees ka insistuar që dëshmitarja të tregojë se cila është mënyra e cila i përcakton disa dokumente si konfidenciale.

Rees-Dëshmitarja: Pyetje-përgjigje

Avokati Rees: Çfarë tiparesh morët parasysh, çfarë veçorish, që ju bënë të besonit që ishte diçka konfidenciale, çfarë tiparesh nuk ju bënë të mendosh se një dokument ishte konfidencial?

Dëshmitarja Pumper: Kam parë një nga një dokumente dhe për secilin dokument kam listuar veçori që mendova se mund të ishin konfidenciale, për shembull ato që thuhen konkretisht në dokument që dokumenti është konfidencial, dokumenti kishte një numër çështjeje ishte nxjerrë nga prokurori i krimeve të luftës në Serbi, nga policia në Serbi, apo nga TFHC, se dokumenti mbante informacion mbi krime apo hollësi të personave, dëshmitarëve, apo dëshmitarëve të mundshëm, hollësi personale po përshkrime informacioni për krime.

Avokati Rees: Ju nuk morët parasysh, kur patë fjalën konfidenciale që i bashkëngjitej dokumentit, nëse e kishte vendosur këtë fjalë një autoritet i duhur, që ishte klasifikuare si dokument konfidencial?

Dëshmitarja Pumper: Jo.

Avokati Rees: Nëse procesi i klasifikimit të dokumentit ishte i ligjshëm?

Dëshmitarja Pumper: Jo, nuk e bëra këtë.

Avokati Rees: Nëse klasifikimi ishte i nevojshëm?

Dëshmitarja Pumper: Jo

Avokati Rees: Nëse përdorej për të fshehur shkeljen e autoritetit të kompetencës për shembull?

Prokurorja Bolici : Kundërshtoj, dëshmitarja i tregoj faktorët që mori parasysh.

Gjykatësi: E pranoj kundërshtimin, pyetjet janë bërë dhe është përgjigjur, po përpiqeni të shtoni dëshmi që ajo nuk është e gatshme të jap.

Rees-Dëshmitarja: Pyetje-përgjigje

Avokati Rees: Dhe kush ishin personat që i përcaktonin në Serbi dokumentet si konfidenciale?

Dëshmitarja Pumper: Unë nuk e di se kush ishin këta persona, unë kam parë dokumente që kishin këtë përcaktim dhe dukeshin sikur ishin nga institucionet serbe.

Avokati Rees: A e keni verifikuar autoritetin e këtyre personave për t’i përcaktuar dokumentet në Serbi si konfidenciale?

Dëshmitarja Pumper: Jo.

Avokati Rees: A keni verifikuar që është bërë i duhur në Serbi për dokumentet serbe për tu klasifikuar si konfidenciale?

Dëshmitarja Pumper: Jo.

Avokati Rees i ka prezantuar dëshmitares edhe disa dokumente të datës 8 shtator, për të cilat ka thënë se janë transkript i një interviste. Të njëjtat nuk janë bërë të ditura për publikun.

Rees-Dëshmitarja: Pyetje-përgjigje

Avokati Rees: Ju ishit në dijeni që kishte një interesim të konsiderueshëm nga shtypi sa i takon ngjarjes së 7 shtatorit, e pranoni këtë, që kishte një interes në shtyp?

Dëshmitarja Pumper: Nuk i kushtova rëndësi asokohe sepse isha përfshirë në një punë tjetër.

Avokati Ress: Pra, nuk u vetëdijesuat për raporte, reportazhe, artikuj në televizione, dhe në shtyp sa u takon ngjarjeve të 7 shtatorit?

Dëshmitarja Pumper: Po, dua të them që i kam kushtuar rëndësi atyre, sigurisht kam dëgjuar për to, por nuk kam bërë kërkim.

Rees-Dëshmitarja: Pyetje-pëgjigje

Avokati Rees: Si ndodhi që e filluat shqyrtimin, ju kërkuan juve ta bëni apo e keni nisur me nismën tënde?

Dëshmitarja Pumper: Ma ngarkuan si detyrë.

Avokati Rees: Pra, procedurë normale e punës në ZPS është të ngarkohet një detyrë verbalisht për të bërë një detyrë, pa mbajtur një proces verbal, ndonjë dokumentacion?

Dëshmitarja Pumper: Po, kështu është.

Avokati Rees: Kush ta ngarkoi këtë detyrë verbalisht?

Dëshmitarja Puper: Zonja Bolici.

Avokati Rees: Çfarë të kërkojë ajo që të bëje.

Dëshmitarja Pumper: Nuk më kujtohen hollësitë.

Avokati Rees: Prandaj po të ishte mbajtur shënim me shkrim do të ishte një dokument i dobishëm.

Dëshmitarja Zenka Pumper ka thënë se dokumentet që i ka shqyrtuar dhe klasifikuar pastaj si paketa 1 ishin kopje.

Dëgjimi i dëshmitares së parë po vazhdon në Dhomat e Specializuara në Hagë dhe kjo është dita e tretë e dëshmisë së saj. Hysni Gucati e Nasim Haradinaj po marrin pjesë në seancë me prezencë fizike.

Ish-krerët e OVL-UÇK akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, frikësim të dëshmitarëve, hakmarrje dhe shkelje të fshehtësisë së procedurës.

Në organizatën që ata drejtonin kishin arritur disa pako që pretendohej të ishin me dokumente që kishin rrjedhur nga Zyra e Prokurorit të Specializuar. Të gjitha këto ata i kishin bërë publike përmes konferencave për media dhe paraqitjeve të tjera publike.

Ata janë arrestuar më 25 shtator 2020 në Prishtinë prej kur edhe mbahen në qendrën e paraburgimit në Hagë.