Ja cilat shtete po ofrojnë shtetësi për të pasurit në këmbim të investimeve – AlbMania    
     

Ja cilat shtete po ofrojnë shtetësi për të pasurit në këmbim të investimeve

 Ja cilat shtete po ofrojnë shtetësi për të pasurit në këmbim të investimeve

Tre kryeministra dolën në skenën e një konference të organizuar në një hotel me pesë yje në Londër për të ofruar “pasaporta të arta” dhe shtetësi për njerëzit e pasur me kusht që ata të investojnë mijëra dollarë në këto vende.

Allen Chastanet, kryeministër i shtetit të vogël të Shën Lucias, tha para 300 personave të pasur dhe këshilltarëve të tyre se misioni ekonomik i vendit të tij është që t’ua ofrojë atyre një vend të rehatshëm për të jetuar.

Ai premtoi se do t’ua japë shtetësinë e vendit të tij brenda tre muajve të gjithë personave që i dhurojnë 100 mijë dollarë për fondin ekonomik kombëtar. Kështu, ata do të pajiseshin me një pasaportë me të cilën mund të udhëtojnë pa viza në 145 shtete, përfshirë Britaninë e Madhe, vendet e BE-së dhe Singaporin.

Në këtë konferencë shitje të pasaportave ofruan edhe kryeministrat e Shqipërisë dhe të Malit të Zi, një ministër i Maltës, një ambasador i Antiguas dhe Barbudas dhe disa përfaqësues nga Qiproja.

Megjithatë, Vera Jourova, nënpresidente në ardhje e Komisionit Evropian, paralajmëroi se këto oferta nuk janë plotësisht të sigurta. “Skemat e shtetësisë i ngritin disa shqetësime. Dhurimi i shtetësisë paraqet rrezik serioz për sigurinë, sepse ua ofron përfituesve të gjitha të drejtat e qytetarëve të BE-së dhe ua mundëson atyre lëvizjen e lirë në territorin e Bashkimit Evropian”, tha ajo.

Qiproja, që kërkon investime prej së paku 2 milionë eurosh në këmbim të pasaportës, ia dha shtetësinë Jho Low-it, biznesmen nga Malajzia që dyshohet për mashtrim në një skandal të madh financiar në vendin e tij, shkruan “The Guardian”.