Më 15 tetor, “PO” për Shqipërinë dhe Maqedoninë – AlbMania    
     

Më 15 tetor, “PO” për Shqipërinë dhe Maqedoninë

 Më 15 tetor, “PO” për Shqipërinë dhe Maqedoninë

Sipas lajmit të publikuar nga media prestigjioze Bloomberg, ka shumë mundësi që Bashkimi Europian të autorizojë fillimin e negociatave zyrtare të pranimit të Shqipërisë dhe Maqedonisë e Veriut muajin tjetër. Sipas saj perspektiva e anëtarësimit në ‘klub’ do të ndihmojë në afrimin e mëtejshëm të rajonit të trazuar të Ballkanit drejt kontinentit në Perëndim.

“Në dritën e përparimit të arritur në fushën e reformave”, ministrat e BE-së që do të mblidhen në Luksemburg në 15 tetor do të vendosin “të hapin negociatat e pranimit” me qeveritë e Tiranës dhe Shkupit, sipas një drafti të komunikatës së tyre të publikuar të premten dhe parë nga Bloomberg. Ndërsa formulimi mund të ndryshojë akoma, një draft i mëparshëm, i parë gjithashtu nga Bloomberg, nuk përfshin rekomandimin për të filluar bisedimet.

Një shtytje e ngjashme për të hapur negociatat e pranimit u lakua edhe në qershor, pasi vende si Franca, Holanda, Gjermania dhe Danimarka rezistuan. Qeveritë e BE-së perëndimore janë acaruar nga dështimi i disa kombeve lindore që iu bashkuan bllokut nga 2004 për të mbështetur sundimin e ligjit dhe luftën kundër korrupsionit. Kështu ata janë të kujdesshëm të pranojnë anëtarët e rinj në klubin më të madh tregtar në botë, ku njerëzit, mallrat dhe shërbimet mund të lëvizin lirshëm. Megjithatë, agjencia ndërkombëtare e lajmeve Reuters shkruan se meqenëse Holanda ka dalë kundër hapjes së negociatave BE-Shqipëri, tashmë çdo gjë është në dorë të presidentit të Francës, Emmanuel Macron.

“Duke qenë se Gjermania është e bindur për hapjen e negociatave me Shqipërinë, me 9 kushte për të plotësuar, Holanda ishte skeptike për arritjet e Shqipërisë në luftën kundër korrupsionit. Fati i integrimit të Shqipërisë drejt Bashkimit Evropian duket se do të jetë në dorë të vendimit të Francës”, shkruan Reuters, ndërsa shton se Maqedonia e Veriut ka një “PO” dhe mbetet e pandryshuar, ndërkohë që nuk jepet një datë e caktuar për konferencën e parë ndërqeveritare me Shqipërinë. Po ashtu, Reuters shkruan se nëse ministrat e BE-së nuk arrijnë një marrëveshje, kancelarja gjermane, Angela Merkel, mund të kërkojë ndihmë nga Macron për të arritur kompromisin.