Vjosa Osmani garon në zgjedhje në listë të përbashkët me LVV-në, konfirmojnë nga kjo parti – AlbMania          

Vjosa Osmani garon në zgjedhje në listë të përbashkët me LVV-në, konfirmojnë nga kjo parti

 Vjosa Osmani garon në zgjedhje në listë të përbashkët me LVV-në, konfirmojnë nga kjo parti

Nënkryetarja e Kuvendit të Kosovës, njëkohësisht edhe deputetja e Lëvizjes Vetëvendosje, zonja Arbërie Nagavci, u shpreh në “Euronews Albania” se sa më shpejt të mbahen zgjedhjet, do të sjellin një legjitimimet të ri të institucioneve.

“Për fat keq është se kësaj radhe zgjedhjet po mbahen shumë shpesh. Ka një kohë të gjatë që në Kosovë nuk ka një qeveri stabile, që të ketë një mandat të plotë, por kjo në këtë radhë është e mirëseardhur se e konfirmoi Gjykata Kushtetuese. Në realitetin aktual, ku ne aktualisht nuk kemi kryeministër, sepse sipas njoftimit të Gjykatës Kushtetuese zoti Hoti asnjëherë nuk ka qenë kryeministër dhe qeveria ‘Hoti’ aktualisht nuk më është një qeveri legjitime. Sa më shpejt që të mbahen zgjedhjet, do të sjellin një legjitimimet të ri të institucioneve në Kosovë”, u shpreh ajo.

“Ne aktualisht dhe ligjërisht do të duhej të ishim në pushtet, për më tepër të gjitha sondazhet e tregojnë se Lëvizja jo vetëm që është fuqia e parë politike në vend, do të fitojë bindshëm, do të kalojë edhe 50% dhe do arrijë që të krijojë një qeveri stabile”, tha zonja Nagavci.

Sa i përket bashkëpunimit me Vjosa Osmanin, ajo deklaroi se do të garojnë bashkë në zgjedhjet e ardhshme.

“Varet sesi do të shkojë në zgjedhje Osmani. Për aq sa ajo ka deklaruar dhe kemi parë deri më tani sigurisht që do të krijojë një listë zgjedhore dhe do të garojë bashkë me ne në listën e përbashkët”, tha nënkryetarja e Kuvendit.

“Ne besojmë që do të garojmë bashkërisht në këto zgjedhje dhe do të fitojmë shumicën”, theksoi ajo më tej.

Ndërsa për çështjen e koalicioneve me partitë e tjera, ajo nënvizoi se nuk do të ketë të tilla.

“Nuk besoj se do të kemi koalicion. Jam e bindur që nuk do të kemi me ndonjë parti, të paktën prej këtyre partive që kanë qenë në qeverisje”, përfundoi zonja Nagavci. /euronewsal/